ELAk positibotzat jo du Nafarroako Gobernuak prebentzio zerbitzuen koordinazio publikoa ezartzeko hartutako erabakia, eta berretsi egin du ISPLNren bitartekoak handitzeko eskakizuna
Nafarroako Gobernuak koronabirusaren osasun krisiarekin lotutako hainbat neurri onartu zituen atzo, besteak beste, NOPLOIk "Nafarroako lan arriskuen prebentzio zerbitzu guztien koordinazio exekutiboa" egitea. Neurri horren helburua da industria eta eraikuntzako jardueren berrekitearen aurrean COVID-19aren aurkako prebentzio-neurriak ezartzeko irizpide-batasuna ezartzea, eta, aldi berean, langile autonomoen eta enpresa txikien aholkularitza teknikoa bere gain hartzea.
Lehenik eta behin, ELAk uste du egungo egoeran ez direla beharrezkoak diren baldintzak betetzen funtsezkoak ez diren sektoreen jarduerari berrekiteko, eta salatu du kontraesana dagoela etxeetan konfinamendua bermatzeko neurriekin eta lanpostuetara jo beharrarekin. Sindikatuaren ustez, ulertezina da milaka langile lanera itzultzea, eta segurtasun-materiala beharko dute, langile sanitario, sozio-sanitario, paziente eta funtsezko jarduerak egiten dituzten gainerako langile guztientzako norbera babesteko ekipamendurik eta maskararik ez dagoenean. Zoritxarrez, COVID-19ren egungo osasun-krisialdian, agerian geratu da Nafarroako Gobernuak patronalarekin dituen jarrerak bat datozela (funtsezkoak ez diren jarduerak geldiaraztearen aurkako jarrera, Ostegun Santuko merkataritza irekitzearen defentsa).
ELAk gogorarazi nahi du joan den astean zenbait proposamen egin zizkiola Nafarroako Gobernuari, jarduera ekonomikora itzultzeko balizko egoera bati begira; besteak beste, prebentzio-zerbitzuen zuzeneko kontrola ezartzea, prebentzio-estrategiaren zerbitzura jartzeko eta, behar izanez gero, barne-antolamenduan eragiteko.
ELAk positibotzat jo du Gobernuak hartutako neurria plantillen segurtasuna eta osasuna bermatzeko bidean. Hala eta guztiz ere, ELAk ohartarazi du NOPLOIren egungo bitartekoak ez direla inolaz ere nahikoak prebentzio-zerbitzuen jardueraren kontrol eraginkorra egiteko, kontuan izanik 50 pertsona sartu beharko liratekeela lan-ikuskaritzako langileekin batera, Europako mailarekin parekatzeko. Horri dagokionez, ELAk bere esker ona adierazi nahi die Laneko Osasun Zerbitzuko langileei, osasun-krisia hasi zenetik egiten ari den lanagatik.
Hala ere, ELAren ustez, COVID-19aren aurkako prebentzio-neurriak betetzen direla bermatzeko, beharrezkoa da sindikatuen eta enpresen arteko negoziazioa erraztea, ikuskapen-jarduera arin eta erabakitzailea gaitzea, bai eta desadostasunak eta ez-betetzeak ematen direnerako agintaritza publikoak esku-hartze zuzena izatea.
Aurreko guztiagatik, ELAk positibotzat jo du Nafarroako Gobernuak prebentzio zerbitzuen koordinazio publikoa ezartzeko hartutako erabakia, eta berretsi egin du ISPLNren bitartekoak handitzeko eskakizuna.