Albisteak

Gipuzkoako Ehungintzako langileek 11 eguneko lanuztea hasi dute ELAren babesarekin, patronalaren blokeoa salatzeko

2022/12/28

“Inozentadarik ez Ehungintzaren negoziaketan!” aldarria ahotan, gaur hasi eta urtarrilaren 7ra arte greba egingo dute lurraldeko sektoreko langileek. Beste zortzi greba egun egin dituzte aurten, baina Adegi eta Gipuzkoa Merkatariak patronalek ez dute berba egiteko imintziorik ere egin. Inuzenteen eguna ardatz hartuta mobilizatu dira gaur, eta ekitaldi ikusgarriekin jarraituko dute borroka, oraingoz, datorren astera arte.

Gipuzkoako ehungintzako merkataritzan greba egun gehiago deitu dituzte, abenduaren 28tik urtarrilaren 7ra

2022/12/23

Patronalak negoziazioa blokeatzen jarraitzen duenez, greba egun berriak deitu dituzte Gipuzkoako ehungintzako merkataritzan, abenduaren 28tik urtarrilaren 7ra. Zortzigarren greba egunean, aste honetako bigarrenean, Gipuzkoako ehungintzako merkataritzako langileek gabon kantak erabili dituzte euren lan baldintza eskasak salatzeko. Eguberriak aprobetxatuz, langileek elkarretaratzea egin dute Donostiako San Martin merkataritza gunean, eta Olentzerori bere egoera hobetzeko hitzarmena eskatu diote. Horretarako, honako eskaera hauek jaso dituzte gutunean: lanaldi osoak, ordutegi egokiak, erosahalmena bermatzea, antzinatasun plusa, online plusa...

Gipuzkoako Ehungintza merkataritzan greba patronalaren atzerapausoak salatzeko

2022/12/16

Gipuzkoako ehungintzako merkataritzako langileak greba egiten ari dira hitzarmen kolektiboaren egoera salatzeko. Izan ere, egoera larria bizi du sektoreak: feminizatuta dago, langileek gehiegizko partzialtasuna pairatzen dute; digitalizazio prozesuen ondorioz dendak ixten eta langileak kaleratzen ari dira; ez dago promoziorako aukerarik; eta gero eta funtzio eta lan karga handiagoak dituzte. Hurrengo greba egunak abenduaren 22an eta 23an izango dira. ELAk ez du baztertzen greba egun gehiago deitzea eta mobilizazioak indartzea.

EAEko Hezkuntzako langileen %60k egin du bat grebarekin

2022/12/14

Haurreskoletan eta Haur eta Lehen Hezkuntzan bereziki izan du eragina grebak. Milaka lagun batu dira Gasteizen, goizean, egindako manifestazioan, eta mobilizazioak egingo dituzte arratsaldeko 18:00etan EAEko hiriburuetan.

Gipuzkoako TAO eta Garabietako langileek greba luzatu dute abenduaren 1era arte

2022/11/28

TAOko eta Gipuzkoako garabietako langileek greba abenduaren 1era arte luzatzea erabaki dute, patronalaren eta udalaren blokeoari aurre egiteko. Erabakia patronalen eta udalen mespretxu-jarrerari emandako erantzuna da. ELAk eta LABek ohartarazi dute, halaber, abenduaren 1eko bileran negoziazioan aurrerapausorik ez badago, mobilizazioek aurrera jarraituko dutela.

Bizkaiko eta Gipuzkoako Merkataritzako langileak greba arrakastatsua egiten ari dira Black Friday egunean

2022/11/25

Gipuzkoako eta Bizkaiko merkataritzako langileak greba eguna dute gaurkoa, ELAk deituta Gipuzkoan (Ehungintza), eta ELA eta LABek Bizkaian (Orokorra, Ehungintza, Zapata eta larrugintza). Eta arrakastaz ari dira egiten. Batez ere kate handienetan ari da eragina izaten. Bizkaian, esaterako, honako dendetan: Cortefiel, Springfield, Woman secret, Oysho, Ikks, Merkalcalzados, edo Bobolik ateak itxi dituzte, eta H&M, Parfois , Stradivarius eta Bershka dendetan oso jende gutxirekin aritu dira lanean. Gipuzkoan ere azpimarratu behar da oso langile gutxirekin zabaldu dituztela dendak, eta kate handienetako dendetan bereziki izan duela grebak eragina.

Mitxel Lakuntza: "Soldata eta pentsioen erosahalmena defendatzen ari gara, eta prestazio sozial duinak aldarrikatzen ditugu"

2022/11/19

Gaur, azaroak 19, Hego Euskal Herriko lau hiriburuetan, 15 000 pertsona baino gehiagok egin dute bat aberastasuna banatu eta lan, pentsio eta zerbitzu publikoen defentsan antolatuko mobilizazioekin. Deialdiak deitu dituztenen artean, ELA, Euskal Herriko Pentsiodunen Mugimendua, Euskal Herriko Eskubide Sozialen Karta eta beste hamaika sindikatu eta eragile izan dira.

Gipuzkoako TAO eta Garabietako langileek greba luzatuko dute, azaroaren 27ra arte

2022/11/17

Patronalaren eta udalaren blokeoa ikusita, Gipuzkoako TAO eta Garabietako langileek grebarekin jarraitzea erabaki dute, gutxienez azaroaren 27ra arte, hitzarmena defendatzeko eta negoziazio aktibatzeko. Hala erabaki dute batzarrean, ELAk, CCOOk eta LABek babestuta. Orain arte 13 egun bete dituzte greban. Aldarrikapen nagusiak dira KPIren araberako soldata igoerak eta urteko 1.592 lanordu bermatzea. Izan ere, egun hauetan guztietan ez da mugimendurik izan. Sindikatuen ustez, “dramatikoa” da administrazio publikoek ez erantzutea sindikatuek behin eta berriz egindako bilera eskaerei.

Zumarragako Ibaiondo adingabeen zentroan 35 hezitzaile plaza sortzeko beharra onartu du Eusko Jaurlaritzak

2022/11/16

ELAk azken urteetan 27 demanda judizial egin eta aldeko epaiak lortu ondoren, Funtzio Publikoaren txostenak 85 hezitzaile behar direla aitortzen du, hau da, orain dauden baino 35 hetzitzaile gehiago. ELAk positibotzat jotzen du plaza berriak sortzeko beharra aitortzea, horrek langileak gehiegizko lan- eta ordu-kargetatik askatuko bait ditu; horrela, zerbitzua antolatzeko aukera izanik, zentroan artatzen diren adingabe eta gazteei erantzun hobea emanez.

Gipuzkoako TAOko eta garabietako langileak grebara, azaroaren 9tik 16ra

2022/11/08

ELAk, CCOOk eta LABek deituta, TAOko eta Gipuzkoako Garabietako langileak greban izango dira azaroaren 9tik 16ra, beren hitzarmena defendatzeko. Aldarrikapen nagusiak dira KPIari lotutako soldata igoerak bermatzea eta 1.592 lanordu izatea. Sindikatuek aurreratu dutenez, akordiorik lortu ezean, mobilizazioek aurrera jarraituko dute. Sei eguneko grebaren ondoren, sindikatuek salatu dute administrazio publikoek ez dutela beren gain hartu nahi gatazkan duten erantzukizuna, nahiz eta udalak izan kontratatzaileak eta, ondorioz, zerbitzuaren arduradunak. Grebalariek behin baino gehiagotan eskatu diete bilera udal arduradunei, baina ez dute erantzunik jaso.

Andoaingo Antex Fibres enpresako langileek elkarretaratzea egin dute gertatutako lan heriotza eta lan istripu larria salatzeko

2022/11/04

Andoaingo Antex Fibres SL enpresako langileek elkarretaratzea egin dute gaur, joan den astean enpresan izan ziren bi lan-istripuak salatzeko. Hiru eguneko tartean, bi langilek lan-istripu oso larriak izan zituzten. Haietako bat makina batek harrapatuta hil zen. Heriotza berri honekin, gutxienez 66 langile hil dira Euskal Herrian 2022an, horietako 21 Gipuzkoan.

Astigarragako Cotronic-eko langileek 12 greba egun egin dute enpresak ezarri nahi duen lan baldintzen aldaketaren aurka

2022/11/04

Astigarragako Cotronic enpresako langileek 12 greba egun egin dute gaur, enpresak ezarri nahi duen Lan Baldintzen Funtsezko Aldaketaren aurka. Movistarreko azpikontrata den enpresa honek, ezarri nahi duen LBFAak, astean 5 egun lan egitetik 6 egun lan egitera pasatzea suposatuko luke, larunbatetan lan egin beharko luketelarik inolako ordainsaririk gabe. Honez gain jaiegunetan guardian egotera behartu nahi dituzte langileak, eta zerbitzurik sortuko ez balitz ez litzateke soldatarik ordainduko. Amaitzeko dieten kobroa ezabatu eta lanaldi zatitua ezarriko luke aldaketak.

Akordioa CIE Legazpin

2022/11/02

CIE Legazpiko (Gipuzkoa) enpresa batzordeak (ELA, LAB eta UGT) akordio bat lortu du, gutxienez 200 langilez osatutako plantilla propioa izateko, kontratazio berriak egiteko eta errelebo kontratua aplikatzeko. Akordioa irailean egindako hiru eguneko grebaren ondoren iritsi da, eta azaroaren 2tik aurrera greba mugagabea iragarri ondoren. Akordioaren bidez, azken urteetako etengabeko enplegu galera irauli eta kalitatezko enplegu egonkorra sortu nahi da, batez ere, Legazpiko lantegian azken urteetan egindako inbertsioak kontuan hartuta.